प्रस्थापित

चिचुकेच मला खाताना वरणावर कळले होते
वमनाने केली सुटका पचनाने छळले होते।।
मी नव्हतो ‘उंच’ कधीही व्याख्येत पुरस्काराच्या
मी नाव तरीही तेथे हमखास घुसडले होते।।
जो नव्हता विषय कधीही माझ्या बुद्धीचा तरीही
मी नको तिथे तेव्हाही हे तोंड खुपसले होते।।
चावून चोथा झालेले माझे नेहमीचे रडगाणे
गावून येथे दुनियेला दररोजच पिडले होते।।
उत्तुंग पातळीवरचे कित्येक कवी ते होते
मी काडय़ा केल्यानंतर मागेच रखडले होते।।
ते गोड गुपित प्रतिभेचे मज कधीच कळले नाही
मी शब्द दुज्या कवितेचे चुपचाप पळवले होते।।
जन म्हणतील काय तयाची पर्वाच मी केली नाही
पैसा मोजून मी सारे सन्मान मिळवले होते।।
भेटला मला जो कोणी लेखक दमदार कसाचा
मी पुस्तक त्या व्यक्तीचे हलकेच उसवले होते।।
मी तारस्वराने माझी कविता खिंकाळत होतो
मी बसलो तेव्हा श्रोते सारेच उधळले होते।।