मुख्यमंत्र्यांच्या दारात

मुख्यमंत्र्यांच्या दारात सह्य़ाद्री उभा ठाकला.
पॅकेज नाहीतर सहावा आयोग द्या म्हणाला.
वर्षांनुवर्षे मोसमी वारे अडवितो.
‘ओटी’ न मांडता काम करतो.
वजन नसले तरी पावसाची फाईल पुढे सरकावतो.
तुम्ही तोडलेल्या झाडांमुळे कुडकुडत उभा राहतो.
माझी लाकडे तोडूनच तुमचं फर्निचर बनतं.
पर्यावरणाचं पासबुक ‘कोरं’ च राहतं.
वयोमानामुळं आता आजार सोसवत नाही.
महागाईमुळं हाता तोंडाची गाठ पडत नाही.
संपावर जाणं माझ्या स्वभावात बसत नाही.
नाक दाबल्याशिवाय तुमचं तोंड उघडत नाही.
सगळ्यांना देताय, मी काय घोडं मारलंय.
मागणाऱ्यांच्या बँकेत मीही खात उघडलंय.
‘उद्या या’ म्हणून कुणाला परत पाठवत नाही.
मागेल त्याला ‘एफएसआय’ वाढवून देत नाही.
शाळा, बागेचं रिझर्वेशन कधी उठवत नाही.
मुख्यमंत्री म्हणाले, मग तू माझ्या काय कामाचा.
तुझ्या सातबाऱ्यावर बोजा नाही युनियनचा.
उभ्या महाराष्ट्राला पगारवाढीचा ‘स्वाईन फ्ल्यू’ झाला.
पन्नाशीतच त्याच्या हातात वॉकर आला.